ಶ್ಯಾಮೆಯಾದ ಯುಮನೆ

ನಗುತಿದ್ದನವನಲ್ಲಿ ಯಮುನೆ ತಟದಿ |

ಬರಿದೆ ನಗುವೇಕೆನುತ ಮುನಿಸತೋರಲು ನಲ್ಲೆ

ಕಿವಿಯಲೇನೋ ಪೇಳುತಿದ್ದ ಸೊಗದಿ || 1 ||

ಪ್ರೇಮಿಗಳ ಸರಸ ಸಲ್ಲಾಪವನು ನೋಡುತ್ತ

ಕೇಳದಿಹ ಮಾತಿಂಗೆ ಯಮುನೆ ಕೊರಗಿ -

ಒಲವಿನುಲಿಗಳನಾಲಿಸುವ ಬಯಕೆಯನು ಹೊತ್ತು

ಸದ್ದಿರದೆ ಹರಿದಿಹಳು ದಡಕೆ ಬಾಗಿ || 2 ||

ತಾನಿದ್ದ ಕಡೆ ಮೆಲ್ಲ ಮೇಲೇರಿ ಬರುತಲಿಹ

ಯಮುನೆಯಾಂತರ್ಯವನು ಶ್ಯಾಮನರಿತು -

ಸಣ್ಣ ಕಲ್ಲನು ಹೆಕ್ಕುತಲಿ ಸಹಜದಿಂದೆಸೆದು

ಅಲೆಯೆಬ್ಬಿಸಿದನಾತ ರಾಧೆಗಾತು || 3 ||

ಮಧ್ಯರಾತ್ರಿಯಲಂದು ಸೀಳಿಕೊಂಡೆನು ನನ್ನ

ನಿನ್ನ ಬದುಕಿಸುವಾಸೆಯನ್ನು ತಳೆದು |

ದಡದಿ ಬೆಡಗಿಯ ಜೊತೆಗೆ ಭುಜಬಳಸಿ ಕುಳಿತೀಗ

ಕೆಣಕುತಿಹೆ ನನ್ನ ನೀ ಕಲ್ಲನೆಸೆದು || 4 ||

ಮಾಡಿದುಪಕಾರಗಳ ಮರೆತೆಯೇನೋ ಶ್ಯಾಮ

ನಿನಗೀಜು ಕಲಿಸಿದ್ದೆನೊಡಲಿನಲ್ಲಿ |

ಸೊಕ್ಕು ತೋರುವೆಯೀಗ ‘ದಕ್ಕದಿರಲೀ ರಾಧೆ'-

ಯೆನುತ ಹರಿದಳು ಯಮುನೆ ಕೋಪದಲ್ಲಿ || 5 ||

ಗಂಭೀರ ನುಡಿಗಳಿಗೆ ದಿಗಿಲುಗೊಂಡನು ಶ್ಯಾಮ

ಧುಮುಕಿದನು ತಡಮಾಡದೆಲೆ ಯಮುನೆಗೆ |

ಶ್ಯಾಮನಾಲಿಂಗನಕೆ ಕಪ್ಪಗಾಯಿತು ನೀರು

ಬೊಗಸೆಯಲಿ ಮರಳೆತ್ತಿ ತಂದ ದಡೆಗೆ || 6 ||

ಹಸಿಮೈಯನೊರೆಸಿದಳು ನಲ್ಲೆ ದಾವಣಿಯಿಂದ

ಶ್ಯಾಮ ಕುಸಿದನು ಬೊಗಸೆ ನೋಡಿ ಬೆವತು |

ಹುಡುಕಿದನು ಸಿಗಲಿಲ್ಲ ತಾನೆಸೆದ ಕಲ್ಲುಗಳು

ಯೋಚಿಸುತಲಿಹನೀಗ ರಾಧೆ ಕುರಿತು || 7 ||

******

ಮೊಗದ ಮೇಲಿನ ನಗೆಗೆ ದ್ವೇಷದುರಿಯನು ತೀಡಿ

ತಿಳಿಬಗೆಗೆ ಕೆಸರೆರಚೊ ಕುಟಿಲವೇಕೆ? |

ನಡುಬೀದಿಯಲಿ ಸಿಕ್ಕ ಭರವಸೆಯ ಕತ್ತಮುಕಿ

ಉಸಿರುಗಟ್ಟಿಸುವಂಥ ಛಲವಿದೇಕೆ? // 1 //

ನಿತ್ಯವರಳುವ ನಗೆಯ ಮಲ್ಲಿಗೆಯ ದೂರುತಲಿ

ಮನದಾಸೆ ಮುರುಟಿಸುವ ಮದವಿದೇಕೆ? |

ಸತ್ಯ ತೆರೆದಿಡೊ ಮನವು ಮಿಥ್ಯವಲ್ಲದ ಪ್ರೀತಿ

ಬೇಡವೆನ್ನುವ ಬರಡು ಶಪಥವೇಕೆ? // 2 //

ಕನಸುಗಂಗಳ ಸುಟ್ಟ ಶುಷ್ಕಭಾವಗಳೊಲವು

ಮುಸಿನಗುತ ನೆಮ್ಮದಿಯ ನುಂಗುತಿರಲು |

ತೆವಳಲುಳಿವುದೆ ಕಸುವು? ಹಾರಲಿರುವುದೆ ರೆಕ್ಕೆ?

ಕುಸಿದ ನಂಬುಗೆ ಬದುಕು ನರಳುತಿರಲು // 3 //